صدقے تیرے بَلے بَلے
چھڈیا کی اُو اپنے پَلے
سب دی آپو اپنی دنیا
ساریاں دے وچ سارے کَلے
یاداں دے نال ویہڑا پریا
کُوکاں نے دروازے مَلے
لبھو کیہڑا مخبر ایتھے
رَلیا جیہڑا دشمن وَلے
اخیری ویلے ساہ دا جھکڑ
خورے کِناں تیکر چَلے
جیہڑا بہہ جائے منگویں کرسی
ڈِگدا ویلیوں پہلے تَھلے
عشق دا گہنا پا بیٹھے آں
لاہ دِتے سب چھاپاں چَھلے
ماوٰی سلطان
No comments:
Post a Comment
Note: only a member of this blog may post a comment.