مزدوری لئی روز سویرے منڈی جان وچارے لوک
کم نئیں لبدا پرت آوندے نیں بعضے کرماں مارے لوک
شاید کوئی آجر آ کے دیہاڑی اُتے لے جاوے
ایسے آس تے بہہ رہندے نیں پُنجھے آساں مارے لوک
خورے کسراں ساہ لیندے نیں سُکیاں سڑیاں پِنجراں چوں
اُجڑے ہوئے ڈِگے ہوئے ٹٹّھے ہوئے ڈھارے لوک
اُچیاں ہڑباں ڈونگیاں گَلہاں سو سو جُھریاں مونہاں تے
سُکے ہوئے سُنگڑے ہوئے بالکل وانگ چھوارے لوک
اِنجر پِنجر ہل جاندے نیں تاں دو پیسے مِلدے نیں
سوچاں ڈُبے کہار آوندے نیں تھکے ٹُٹّے ہارے لوک
جوڑ چُھڑک گئے موہنڈے ڈھلک گئے موہرے کھِسک گئے کنڈاں دے
بارہ مہینے گارے ڈھو ڈھو آپوں ہو گئے گارے لوک
رُکھی سُکی کھا کے سبھے مزدوری نوں جاندے نیں
آہواں بھردے کھوں کھوں کردے ساہ تے کھنگ دے مارے لوک
کئی ماواں دے چنّ ستارے کچرے وانگوں رُل گئے نیں
سَڑ سُڑ گئے نیں گَل گُل گئے نیں کِڈے پیارے پیارے لوک
ہمتوں بوہتا کم کر کر کے گھسدے گھسدے گھس گئے نیں
ککھاں نالوں ہولے ہوئے نیں سونے نالوں بھارے لوک
آسماناں نوں چُھوندے پئے نیں بھا چیزاں دے چڑھ چڑھ کے
ہولی ہولی پوہنچ رہے نیں سارے قبر کنارے لوک
کاش اک ایسا حاکم آوے جیہڑا سوچے غور کرے
خود کُشیاں کیوں کردے پئے نیں ایتھے راج دُلارے لوک
آؤ شریعت نافذ کرئیے ہر مسئلے دا ایہہ حل اے
غربت نوں ہُن ایتھوں کڈئیے مِل ملا کے سارے لوک
فیض الحسن ناصر
No comments:
Post a Comment
Note: only a member of this blog may post a comment.