بانہواں دے وچ پا کے بانہواں ہاسے گلاں کردے
کِدھر گئے اوہ نال ہواواں ہاسے گلاں کردے
شہر تِرے نوں بُھل جانا اے شہر تِرے دا ہاسا
ویکھ لوے جے کول کپاہواں ہاسے گلاں کردے
بد نِیتاں نوں کیہ مِلیا اے اینے رونے دے کے
جِتھے ویکھے پنج دریاواں ہاسے گلاں کردے
موڈھا لا کے جے کر میرے نال ٹُریں توں مِترا
میں پنجاب چہ موڑ لیاواں ہاسے گلاں کردے
کنکاں وڈھدے، مونجی کُٹدے اکھ وچ سُفنے لے کے
نہیں ویکھے تے آ ویکھاواں ہاسے گلاں کردے
چڑھدیوں لہندے ول جے آویں لے کے کِھڑیا متھا
لہندیوں میں وی لے کے آواں ہاسے گلاں کردے
اِک اِک اکھ دے پُنجھ کےاتھرو وس چلے جے میرا
سارے جگ دے وچ ورتاواں ہاسے گلاں کردے
ساہویں بیٹھا ہسدا رہیں تے شعراں دی تھاں سندھو
جی کردا اے لکھدا جاواں ہاسے گلاں کردے
ارشاد سندھو
No comments:
Post a Comment
Note: only a member of this blog may post a comment.