بے قدری دے ٹُک ٹُک کھا گئے کِنج کِنج کِیڑے سانوں
کالے شہر چہ راس نہ آئے چِٹے لِیڑے سانوں
جہڑے ایویں کُھل جاندے سن بند رہے کُھلن ویلے
ہولی ہولی لے بیٹھے نیں جِبھ دے بِیڑے سانوں
کل نوں کِدھرے نہیر پیا تے اوہناں کیہ آؤنا
کلیاں چھڈ ٹُر گئے جو وچکار گھرِیڑے سانوں
جِہنوں تلیاں اُتے چُکیے مِدھدا پیراں تھلے
جِہدے لئی کھنڈ بن جانے آں اوہ ای پِیڑے سانوں
جد کدی وی ساڈے دِل وچ رانجھا رانجھا ہوئی
اوسے ویلے ڈنگ لیندے نیں لنگ لنگیڑے سانوں
تنگ ذہناں دے مالک سارے سوڑاں بھیڑا مارے
اپنی کُھل لئی کردیندے نیں سوڑے بِھیڑے سانوں
تاں تے سندھو ساڈے وِچوں اج تک زہر نہیں مُکیا
ناگاں دی تھاں لڑدے رہے نیں جوگ جوگِیڑے سانوں
ارشاد سندھو
No comments:
Post a Comment
Note: only a member of this blog may post a comment.