درداں لائے ڈھیر فقیرا
دُکھاں پائی اچیر فقیرا
رات ہنیری ودھی جاوے
کیوں نہ ہوندی سویر فقیرا
خورے کوئی ناٹھی آوے
بولے کاگ بنیر فقیرا
طوطے وانگوں بیری چڑھ کے
ٹُک ٹُک کھائیے بیر فقیرا
سیک جرن ہنڑ اوکھے ہوئے
نظراں پائے گھیر فقیرا
بھونچال مچائی رکھنا ایں
ساڈے چار چفیر فقیرا
سینے اندر ساہواں شُوکن
گھلے رہنڑ ہنیر فقیرا
شام وچالے گھر آ جاویں
بوہتی کریں ناں دیر فقیرا
جاندی وار غزالی ولوں
اکھیاں انج ناں پھیر فقیرا
امجد کلیم غزالی
No comments:
Post a Comment
Note: only a member of this blog may post a comment.