پنجابی نعتیہ کلام
ایہو سدا سوچ دا معیار ہوناں چاہی دا
اللہ دے حبیبﷺ نال پیار ہونا چاہی دا
سانوں یارِ غارؓ نے ایہہ دسیا اے دوستو
سب کچھ سوہنے توں نثار ہونا چاہی دا
حضرت صدیقؓ دے ایہہ دل دی تمنا سی
یار دے مزار نال،۔ مزار ہونا چاہی دا
ساڈے اُتے ہو جان،۔ اللہ ایہہ عنایتاں
جیوندے جیوندے سوہنے دا دیدار ہوناں چاہی دا
جیہڑے تیرے نام دیاں محفلاں سجاندے نیں
اوہناں بیلیاں دا بیڑا پار ہوناں چاہی دا
نام لواں جدوں تیراؐ مِرے من موہنیاں
بِناں پیتے اکھاں چ خمار ہوناں چاہی دا
لجپال سوہنے دیاں نظراں دے سامنے
گھر ہوناں چاہی دا، مزار ہوناں چاہی دا
دم دم خیر منگے جیہڑا تیرے دم دی
دنیا چ ایسا وی کوئی یار ہونا چاہی دا
یاد کرو جیہڑے ویلے اپنے غلاماں نوں
ساڈا وی غلاماں چ شمار ہونا چاہی دا
لباں تے نیازی! ہوون ساہ جدوں آخری
اوس ویلے سوہنےؐ دا دیدار ہوناں چاہی دا
عبدالستار نیازی
No comments:
Post a Comment
Note: only a member of this blog may post a comment.