پنجابی نعتیہ عارفانہ کلام
سرکارﷺ بنا لطف و عطا کون کرے گا
اُمت لئی رو رو کے دعا کون کرے گا
رب اپنے گنہگار نوں بھیجے اودے در تے
سرکارﷺ بنا معاف خطا کون کرے گا
خود فاقے رہوے، آئے سوالی نوں رجاوے
ایہہ لطف و کرم،۔ جود و سخا کون کرے گا
موت آوے جے سرکارؐ دے قدماں وچ یارو
فیر اپنی حیاتی دی دعا کون کرے گا
نہ ہوش رہوے اپنی جنہوں جا کے مدینے
فیر اوس گواچے دا پتا کون کرے گا
سرکار دے بوہے تے جنہے پا لئی اے کلی
اس کلی تے عاشق نوں جدا کون کرے گا
وچ روضۂ اطہر دے پئے نال جو دونوںؓ
سرکارﷺ دے یاراںؓ نوں جدا کون کرے گا
چھٹ جان گے اک روز وی عمراں دے وی قیدی
پر زلفاں دے اسیراں نوں رہا کون کرے گا
اللہ وی جدی نعت پڑھے آپ ظہوری
حق اوہدیاںؐ نعتاں دا ادا کون کرے گا
محمد علی ظہوری
No comments:
Post a Comment
Note: only a member of this blog may post a comment.