پنجابی نعتیہ عارفانہ کلام
جنت دے سرداراں دے سردار نبیﷺ
تیرے ناں توں واراں میں گھر بار نبیؐ
میں وی عرش دے ویڑھے چہاتی مار لواں
بُوہا اپنا کھول دَون اک وار نبیﷺ
کمی تے کمی دی یاری جچدی اے
امت دا تے یار نئیں ہوندا یار نبیؐ
تیرے عشق دی قیمت، کوٹھا جنت دا
ایسے مال دا مول نئیں درکار نبیؐ
لگدا اے اک بُوہا ایتھے بننا اے
چُمدے نے کعبے دی اک دیوار نبیؐ
آل اللہ دا ایخو مطلب لگدا اے
اللہ دے نے گوڑھے رشتہ دار نبیؐ
کالی کملی جھاڑ دون جے اک واری
لکھاں آدمؑ کر دیون تیار نبیﷺ
کالی کملی جھاڑ دون جے اک واری
لکھاں آدمؑ کر دیون تیار نبیﷺ
بس اوخو مولاؑ اے مست ملنگاں دا
جس دے سر تے رکھ دیون دستار نبیؐ
ڈھیری بن کے خاک دی راہ وچ وچھ جاواں
لنگ جاون اک نقش بنا کے پار نبیؐ
دو واری میں حیدرؑ حیدرؑ کہنا واں
کہنا واں میں فیر اکبر اک وار نبیؐ
حسنین اکبر
No comments:
Post a Comment
Note: only a member of this blog may post a comment.