حمدیہ نعتیہ عارفانہ کلام
الحمد توں لے کے والناس تائیں
تیرے علم نوں ربِ کریم چُماں
چُماں سنگِ اسود، کہ غلافِ کعبہ
ہووے پہنچ تے عرشِ عظیم چُماں
چُماں نقش تیرے جِدھر نظر آون
یا فیر روضۂ دُرِ یتیمﷺ چُماں
چلو پُچھیۓ چل کے عالماں نوں
پہلاں الف چُماں کے میم چُماں
کرسی عرش اُتے، بوریا فرش اُتے
چھڈ بوریا کیوں عَلِّیِ العَظِیم چُماں
جنہے آن کے خُلق دا درس دِتا
کیوں نا اوس دی طبعِ عظیم چُماں
جس میم نے الف دے بھید کھولے
میرا دل کیہندا پہلاں میم چُماں
عمیر شکور
No comments:
Post a Comment
Note: only a member of this blog may post a comment.