نعتیہ عارفانہ کلام
میں منیا نال یقین دے، میں ویکھیا اکھاں نال
اوہدےؐ ہتھ کھنڈی یٰسین دی، اوہدےؐ گُھنگھر والے بال
اوہدےؐ چارے پاسے نور ہے، اوہداؐ ہر جا عین ظہور ہے
اساں پیراں تے سر سٹیا، اساں چھڈے سب جنجال
اوہدیؐ گھر گھر نوبت وجدی، اے ازلی گل نہ اج دی
اوﷺ میم دی بُکل مار کے، گل کردا ساڈے نال
جنہاں راتاں بیٹھ کے گالیاں، او سکھیاں کرماں والیاں
جنہاں موتی رولے خاک تے، او ہوئیاں سب نہال
او رانجھا بنڑ بنڑ آوندا، توں ہیر سلہٹی بنڑ
توں چرخا کتیں پریم دا، تینوں ملے گا پریم کمال
اوہنوں ملنا سوکھی گل اے، او آپے ساڈے ول
تسی بیٹھو اوہنوں سوردے، او جاوے ڈیوا بال
توں واصف گل نہ مندا، کیوں اپنے درد نوں ونڈدا
جا موجاں مان پیاریا، تیری گڈری آیا لال
واصف علی واصف
No comments:
Post a Comment
Note: only a member of this blog may post a comment.