جسراں سارے جگ تے سِر تے اِکو جہیا آسمان دا رنگ
فِر کیہ ہوندا جے کر دیندا اِکو اپنے وان دا رنگ؟
اوناں دے سِر لوڑاں اگے وِچ میدانے جُھکدے نیں
جہڑے لوک چڑھا لیندے نیں پگاں اُتے آن دا رنگ
اودوں تیک دبا سکدے نیں مظلوماں دا ظالم حق
جد تک میرے ہتھ نئیں آوندا سُتے لوگ جگان دا رنگ
کد تک پرچی گُھلدی رہنی ایتھے اوناں لوکاں دی
جہڑے لوگ وِگاڑی جاندے میرے پاکستان دا رنگ
گھر نہ جہڑا یار وکھاوے، اودے نال یارانہ کی
مُل کدے نہ ٹُکنا لوکو، باہروں ویکھ مکان دا رنگ
ہتھ رہوے گا متھے اُتے ربا! میرا مر کے وی
بُلھے ورگا جے کر دیویں، میری کِتے زبان دا رنگ
کل دے وانگوں اج وی لگدا شیشہ روندا جاوے گا
دسدا پیا اے بابا مینوں پرھیا دے پردھان دا رنگ
بری نظامی
No comments:
Post a Comment
Note: only a member of this blog may post a comment.