جاگ او جاگ پنجابی جاگ
تيرے ہل تے کہی دی خير
منجی سونے جہی دی خير
کنک، کماد، مکئی دی خير
کھا امان دا مکھن، ساگ
جاگ او جاگ پنجابی جاگ
غيراں دے گن گاونا چھڈ دے
ويہلا واندا بھونا چھڈ دے
لمی تان کے سونا چھڈ دے
چھيتی اٹھ جگالے بھاگ
جاگ او جاگ پنجابی جاگ
اپنی پگ سنبھالی رکھ
جوئی ہل پنجالی رکھ
ديوے پيار دے بالی رکھ
مر جائے وير کرودھ دا ناگ
جاگ او جاگ پنجابی جاگ
ماں بولی دا مان ودھا کے
جگ تے اپنی شان ودھا کے
سوچ دا سچا گيان ودھا کے
کر لے ہتھ ويلے دی واگ
جاگ او جاگ پنجابی جاگ
وچ ميداناں ڈھول وجا کے
لڈياں، بھنگڑے، جھومر پا کے
ڈھولے، ماہيے، ٹپے گا کے
چھيڑ محبت والا راگ
جاگ او جاگ پنجابی جاگ
لياقت گڈگور
No comments:
Post a Comment
Note: only a member of this blog may post a comment.