ادھی رات دی رانی سی
پورے چن دی ہانی سی
اڈیاں لشکاں مار دیاں
چاندی چڑھیا پانی سی
پرچھانویں دا وادھا گھاٹا
اوہدی آؤنی جانی سی
سر تے کالی بدلی سی
ہتھ وچ سرمے دانی سی
اکھ او سفنے ونڈن ہار
وکھری سی مستانی سی
دنداں دی کیہہ گل کراں میں
گلاں دے گل گانی سی
لکوں تیلی ورگی سی
اتوں ٹور طوفانی سی
اوہدیاں لکھ اداواں سن
ساڈھی اک جوانی سی
رب نے ریجھاں لاہیاں سن
اوہدا روپ نشانی سی
اوہنوں لبھدا پھردا سی
جنھے جند گنوانی سی
سفنے راہیں آؤندی سی
کاگوں ڈھیر سیانی سی
اوہدے ورگا کوئی نیئں سی
شیشہ ہی اوہدا ثانی سی
ربا تیتھوں منگدا پر
ایویں گل ودھانی سی
اوہدا ہتھ میں کیہہ منگدا
اپنی کنڈ لوانی سی
لیکاں گل کیہہ گؤل دیاں
پانی وچ مدھانی سی
اکھر دتے یاداں نوں
اینج ہی رات ٹپانی سی
کاہنوں سوچی پے گئے او
ایہہ تے چوٹھی کہانی سی
؟؟؟؟؟؟
No comments:
Post a Comment
Note: only a member of this blog may post a comment.