ساڈے ویہڑے اُگیاں بیریاں تاہیوں وٹے مارے جگ
ساڈے سر توں کُھل کے بیلیا ساڈے گل وچ آ گئی پگ
ساڈے ویہڑے وسیاں بارشاں ساڈی چووے کچی چھت
ساڈا گھر نہ ڈھاہویں پانیا!، ایہدی نیہہ وِچ ساڈی رَت
ساڈے ویہڑے آیا وَید نی،۔ سانوں پُچھدا ساڈے دُکھ
ساڈے پِیلے مُکھ نہیں ویکھدا، سانوں کوہیا کڑمی بُھکھ
ساڈے ویہڑے دھکھیاں دھونیاں ساڈے سڑدے الھڑ چاء
ساڈے اکھیں کوسے نِیر وے، ساڈے سینے اندر تاء
ساڈے ویہڑے آئی عید نی،۔ ساڈے امبو ملیا سک
ساڈے تن تے لیراں پاٹیاں ساڈے بچے کن تے نک
ساڈے ویہڑے ساڈا بابلا، سانوں آکھے بھاویں پت
ساڈی ماں نوں پیندے ہول نی ساڈی جسلے کردی گت
ساڈے ویہڑے دس وے مالکا! سانوں کس دن لبھنا رَج
ساڈے خالی رون بھڑولڑے، ساڈے وَین کریندے چھج
اکرم ریحان
No comments:
Post a Comment
Note: only a member of this blog may post a comment.