جدید پنجابی شاعری
ادھیاں
ماں کولوں پُچھیا
پیؤ وی نہیں دسدا
ایہ گل وِیراں کولوں
پُچھ وی نہیں سکدی
اسیں جدوں جمیے تے
چاء کیوں نہیں چڑھدے
سارے ای نیں
بے تقصیراں نال لڑدے
رب نے جو لکھیا اے
اوہ کیوں نہیں پڑھدے
نہ ساڈا در اے
نہ کوئی گھر اے
نہ ساڈی تھاں اے
نہ کِتے ناں اے
اُبری تے سُبری وی
اسیں رہیے کھاندیاں
کُنبے قبیلیاں دے
جھیڑے وی مُکاندیاں
چُنیاں دے بدلے ہاں
پگّاں نُوں بچاندیاں
مال وانگوں اِک دُوجے
نال وی وٹاندے او
انکھاں دی سُولی تے وی
سانوں ای چڑھاندے
کئی واری جیوندیاں نوں
موئیاں لکھواندے او
انھے مُورے رسماں
رواجاں وچ بدھیاں
پُورے پُورے جم کے وی
اسیں کیوں ہاں ادھیاں
پُوریو تے سُوریو وے
اسیں کیوں ہاں ادھیاں
ارشاد سندھو
No comments:
Post a Comment
Note: only a member of this blog may post a comment.