جدید پنجابی شاعری
سجن گئے تے رونق اُڈ گئی، سُنے سُنے ویہڑے
وے میں تینوں یاد کراں، ہر چرکھے دے گیڑے
گھڑی اُڈیکاں وصل تیرے دی
رَت پئی سُکے جگر میرے دی
نمھی نمھی واء پُرے دی، دل دے زخم اُدھیڑے
وے میں تینوں یاد کراں، ہر چرکھے دے گیڑے
اُجڑ گئے، بھرے ہوئے میلے
ہتھوں کھُسیا یار کویلے
روون کاہی، رُکھ تے بیلے، ظلم کما گئے کھیڑے
وے میں تینوں یاد کراں، ہر چرکھے دے گیڑے
تیں بن جھڑیاں لہو ورھاون
اج قیامت بن گیا ساون
کندھاں کُوکن تے کُرلاون، چیکاں مارن ویہڑے
وے میں تینوں یاد کراں، ہر چرکھے دے گیڑے
خبرے اج کیوں نیند نہ آوے؟
پئی، پئی دا جی گھبراوے
کدے رضائی وڈھ وڈھ کھاوے، کدے سرہانہ چھیڑے
وے میں تینوں یاد کراں، ہر چرکھے دے گیڑے
کیکن پنڈ ہجر دی چاساں
کیہ کرساں تے کدھر جاساں
بڈھیاں ہوئیاں کواریاں آساں، ٹھلدیاں ڈُب گئے بیڑے
وے میں تینوں یاد کراں، ہر چرکھے دے گیڑے
شارب انصاری
خوشی محمد
No comments:
Post a Comment
Note: only a member of this blog may post a comment.