جدوں مینہہ ورسدا اے
تیری یاد آؤندی اے
کنیاں دی جلترنگ وچوں
تیری آواز آؤندی اے
جدوں پُرے دی وا وگدی اے
تیری یاد آؤندی اے
پُرے دی واء وچوں مینوں
تیری باس آؤندی اے
جدوں رات پیندی اے
تیری یاد آؤندی اے
نیندر وچ تیرے خواباں دی
اک بارات آؤندی اے
جدوں اکلاپا ہوندا اے
تیری یاد آؤندی اے
ایہناں یاداں نال فیر
اک محفل جگمگاندی اے
جدوں چوفیرے رونقاں دے
رنگ کھِلردے نیں
ایہناں رنگاں وچ
تیریاں یاداں دی
ست رنگی پینگھ ہوندی ہے
جیہدے رنگاں وچ، تیرے جیون دے
سارے رنگ ہوندے نیں
جدوں چن چڑھدا اے
تیرے مُکھڑے دے چیتے نال
دل وچ لو ہوندی ہے
چوفیرے چاننا ہوندا اے
جدوں دینہہ نکلدا اے
تیری یاد آؤندی اے
جہان آباد ہوندا اے
میرے دل وچ تیری لو ہوندی اے
تیرے سائے تیرے ساہواں
تیریاں سدھراں تیرے چاہواں لئی
میرے دل وچ دعا آؤندی اے
مینوں ہر پل ہر ساہ نال
تیری یاد آؤندی اے
میرے بُلھاں تے ہر ویلے
تیرے لئی دعا ہوندی اے
خالد حسین تھتھال
No comments:
Post a Comment
Note: only a member of this blog may post a comment.