فرعوناں نوں چھڈ دیندے او
ماڑے تھاں تے ای گڈ دیندے او
حق دی گل جو کردا ایتھے
اوہدی جیبھ نوں وڈھ دیندے او
لا مظلوم غریب نوں پھائے
تگڑے ظالم چھڈ دیندے او
منصوراں لئی دھرتی اُتے
تھاں تھاں سُولیاں گڈ دیندے او
اپنے کھیسے بھرن دی خاطر
توڑ غریب دے ہڈ دیندے او
ویکھ کے میرے پاٹے لیڑے
محفل وچوں کڈھ دیندے او
عزمی ماڑے لوکاں نوں تے
قبر دی تھاں وی اَڈ دیندے او
منصور عزمی
No comments:
Post a Comment
Note: only a member of this blog may post a comment.