جہڑی ڈبی سی وچکار
میں نہیں سوہنی مُٹیار
میرے پلے متاں بجھیاں
مینوں اپنی سوچ وچار
میں نندے تینوں جانڑدی
نہیں چنگا تِرا ویہار
جیہڑی سی کے اپنی جیبھ نوں
لَے چُپ دی بُکل مار
میں نہیں سوہنی مٹیار
اوہناں کیہ دریا وچ تیرنا
جنہاں من اپنے لئے مار
ہُن اگلی گل نہیں ہانیاں
کجھ سوچ کے لنگھی پار
پھل وانگر ٹہنیوں ٹُٹ کے
جہڑی بن جائے گل دا ہار
میں نہیں سوہنی مٹیار
مینوں دے نہ ہور تسلیاں
مینوں گھڑے تے نہیں اتبار
میں چڑھیا ترنا جان دی
مینوں کسے دی نہیں اج سار
جو ماپیاں دی لج رول کے
دیوے رانجھے اُتوں وار
میں نہیں سوہنی مٹیار
اوہ تارو وی ڈُب جاوندے
جہڑے جگرا لیندے ٹھار
مینوں سچا عشق اڈیکدا
میں لنگھ جانا اج پار
قسمت دا لکھیا جان کے
جو جِت نوں من لئے ہار
میں نہیں سوہنی مٹیار
اے ویلا نواں نکور جی
ایتھے پگھنے نویں وچار
میں امبروں تارے توڑنے
تے دینے دھرت کھلار
اوہ جھلیا کوئی ہور سی
جہنوں تو کیتا سی پیار
میں نہیں سوہنی مٹیار
میں نہیں سوہنی مٹیار
نائلہ بٹ
No comments:
Post a Comment
Note: only a member of this blog may post a comment.