سدھراں
وید سیانا کوئی جے دسے
پُچھاں اونھوں دس وے ویدا
دل مکان دے راز اسانوں
دل دا بوہا کیہڑے پاسے؟
کنڈا، کڑی وی ہے کوئی ایدی
جے کر لگدا ہووے کوئی
جندرا کَس کے لاواں اینوں
تاں جے دل دے ویڑے اندر
سدھر کوئی وی پیر نہ پاوے
باری جے کر ہے کوئی ایدی
اودھا پتہ وی دس دے ویدا
اودھا حل وی کر لاں کوئی
تاں جے کولوں لنگدیاں ہویاں
سدھر کوئی نہ چاتی پاوے
سدھر کوئی نہ چاتی پاوے
ہوکے دی اے جم پل لگدی
ہر تھاں تے ہے پھیرا ایدا
جنگل، بیلا یا فیر روئی
سدھر جئی وی ڈین ہے کوئی!
کلّی وی نہیں پھیرا پاوندی
ہاواں، ہاڑے سنگی ایدے
گھر گھر وخت پواڑے پاوے
وین وی نت نت نال لیاوے
نت نویلے روپ نے ایدے
کیہڑے کیہڑے قہر نہ ڈھاوے
کوئی تے چارا دس دے ویدا
نہیں تاں بوہا ای دس دے دل دا
جندرا کَس کے لاواں اینوں
سدھر کوئی وی پیر نہ پاوے
سدھراں، ریجھاں پُگدیاں پُگدیاں
سر 'چ چاندی لہہ آوندی اے
اکھیوں چانن مک جاندا اے
کنڈ کمانی بن جاندی اے
موت دوالے آن کھلوندی
بندہ مکدا، مک جاندا اے
سدھراں، ریجھاں پر نہیں پگدیاں
وید سیانیا دس دے بوہا
جندرا کس کے لاواں اینوں
فاروق احمد بھٹی
No comments:
Post a Comment
Note: only a member of this blog may post a comment.