اج دی کوکلا چھپاکی
کوکلا چھپاکی جُمعرات آئی اے
جیہڑا سچّی گل کرے اوہدی شامت آئی اے
جیہڑا آہو آہو کرے اوہنوں مِلے شاواشے
جیہڑا عقل نُوں دھیاوے اوہدی شامت آئی اے
جیہڑا نیوِیں دھؤنے وگے اوہنوں مِلے شاواشے
جیہڑا اکھ اُچی کرے اوہدی شامت آئی اے
جیہڑا ہر پاسے وگدا اے اوہنوں خیر سلّا
جیہڑا اِکو پاسہ رکھے اوہدی شامت آئی اے
جیہڑا روز وِک جاوے اوہ اے وڈھا سُورماں
جیہڑا وِکناں نہ جانے اوہدی شامت آئی اے
احسان باجوہ
No comments:
Post a Comment
Note: only a member of this blog may post a comment.