سوہنڑاں بہوں ایں توں ڈھول میرا
میں کول بہہ کے تے رج کے ڈٹھا اے
کل نماشی ہوا دے جھولے جے بوہا دھکیا اے
تے میں بھج کے ڈِٹھا اے
تیرے خیالاں دے وچ کھڑاتی
میں آنڑ بوہے تے ماری جھاتی
کملی گلیاں اچ بھوندی رہی آں
چوکھاٹ نپ کے تے روندی رہی آں
آواز کنی کاں کاں دی سُنڑ کے
میں وَٹے گلیاں چوں آندے چُنڑ کے
رو کے کاں نوں مریندی رہی آں
منتاں ہتھ بن کریندی رہی آں
کیوں بنیرے تے نت بولیندا ایں
لونڑ زخماں تے کیوں سٹیندا ایں
قاصد ہتھی پیغام گھلیا
اوہ وی ڈیگر نوں روندا ولیا
سجنڑ تیرا ہک محل بنڑا کے
سُکھی وسدا اے او تین بھلا کے
میں جو ونج کے پیغام دتا اے
تیری الفت دا نام دتا اے
روندی کملی دے سانگے تو رل آ
خدا دا ناں ہئی تو یار ول آ
اس عجیب ہک حساب دتا اے
حیران ہاں انج جواب دتا اے
خط دے کے جو میں ولیا آواں
سنڑیاں مگروں میں عجب صداواں
بے درد خط مینوں موڑ دتا
پار آونڑ تو وی ہوڑ دتا
لے جا واپس اے رونے دھونڑے
میں کی جانڑاں کاوش کونڑ اے
کاوش تمیمی
No comments:
Post a Comment
Note: only a member of this blog may post a comment.