جاگ پنجابی پُترا
پوری ہمت کر کے ہُن تُوں جاگ پنجابی پُترا
کھا جاون گے نئیں تے کنگنی، کاگ پنجابی پُترا
آساں لا کے بیٹھی رہے نہ کِدھرے تیری بولی
اپنی منگ ویاہ لئے بھر کے لاگ پنجابی پُترا
اپنے آپ نئیں مِلدا ہُندا حق اے کھوہنا پیندا
آپ جگانے پیندے اپنے بھاگ پنجابی پُترا
لکھ زمانہ وَیری ہووے بھاویں جِند وی جاوے
پَھڑ لیے تے چھڈی دی نئیں واگ پنجابی پُترا
جے پنجاب دا پُتر ایں توں مِدھدا جا فِر سِریاں
جہڑے جہڑے آون راہ وچ ناگ پنجابی پُترا
اوڑک اوہ دِن آؤنا اے جد کٹھیاں بہ کے کھانے
سانجھی روٹی نال سرہوں دے ساگ پنجابی پُترا
جِس دن سندھو وڈیاں وڈیاں تاراں تے ہتھ رکھیا
ایہناں وچوں نکلن گے کئی راگ پنجابی پُترا
ارشاد سندھو
No comments:
Post a Comment
Note: only a member of this blog may post a comment.