اسیں واسی دیس پنجاب دے کیہ پچھدے او ساڈا ناں
سانوں جمیا پنجاں پانیاں ایہہ دھرتی ساڈی ماں
سانوں لوری دِتی موسماں ساڈا چُمیا مُکھ ہوا
اساں نال پُھلاں دے کھیڈیا ساڈے رُکھ سن بہن بھرا
سانوں کیہڑی ماں نے جمیا اسیں کِس دے پُتر ساں؟
ساڈی سوچ نوں کھاہدا کڑکیاں اسیں بُھل گئے اپنا ناں
اسیں واسی دیس پنجاب دے کیہ پچھدے او ساڈی ذات
ساڈا سُورج سونا وَنڈدا ساڈی چاندی ونڈے رات
اسیں مِرزے ورگے سُورمے اسیں بھٹی ورگے شیر
سانوں تارے دین سلامیاں سانوں سجدہ کرے سویر
اجّ ککھوں ساویں تُل گئے ساڈی پچھے کوئی نہ وات
اسیں گھٹیَاں دے وِچ رُل گئے سانوں بُھل گئی اپنی ذات
اسیں واسی دیس پنجاب دے کیہ پچھدے او شہر گراں
جِتھے جُھمر پاون ٹالھیاں جتھے بوڑھ دی ٹھنڈی چھاں
جتھے بابل عزتاں پالدے جتھے بھیناں مان بھرا
جتھے لاج نبھاون لاڑِیاں جتھے گہنا شرم حیا
اج کھجل ہوئے زمین تے سانوں جَھلدی نہیں کوئی تھاں
ساڈا اپنا آپ گواچیا سانوں بُھل گئے شہر گراں
اسیں واسی دیس پنجاب دے کیہ پچھدے او ساڈا حال
اسیں اپنے آپ نوں بالدے اج سوچ دا بالن بال
ساڈے جسموں روحاں وکھ نیں ساڈے تن من لیرو لیر
ساتھوں ساریاں شاناں کُھسیاں اسیں ہو گئے اج فقیر
سانوں ویلے ویلن ویلیا جیویں ویلی جاوے کپاہ
نہ اکھاں دے وِچ اتھرو نہ سینیوں اُٹھدی ہاہ
اسیں چاک ساں اپنے عشق دے ہُن بن گئے جگ دے چاک
اج ساڈے سر وِچ رَڑکدی پئی ست راہوں دی خاک
سانوں ویلے ایسا کیلیا ساڈے مر گئے نیں احساس
اسیں اپنی رَت نُوں پِیوندے اسیں اپنا کھاندے ماس
اسیں اپنے شہر نوں ڈوبدے اسیں آپے توڑدے بنھ
اسیں اپنے گھر نوں لُٹدے اسیں آپے لاؤندے سنھ
اساں جیہڑے جمے سُورمے اوہناں باہواں لئیاں وڈھ
اساں جیہڑی سوچ نوں پالیا اوہنوں دیسوں دِتا کڈھ
اسیں راٹھ ساں دیس پنجاب دے سانوں ویلے کیتا ہیچ
اج اِک ویلے دی بُھکھ لئی اسیں بچّے دیندے ویچ
سانوں ویلے قیدی کر لیا ساڈے چار چفیر جال
ساڈا ماضی کِتے گواچیا ساڈا کیہ پچھدے او حال
اسیں واسی دیس پنجاب دے اسیں جگ ہوئے غلام
اج گل وِچ بُھکھ دے طوق نیں سانوں کیہڑا کرے سلام
طفیل خلش
No comments:
Post a Comment
Note: only a member of this blog may post a comment.