ظالم خونی رسماں ریتاں، وسدے شہر اجاڑے
ہن تاں ایتھے اوکھے ہو گئے، کٹنے چار دہاڑے
ہر بندے دی درد کہانی مینوں اپنی جاپے
اندروں اندری گُجھی، گُجھی پیڑ کلیجہ پاڑے
اج وی رانجھے بندے جوگی، اج وی رلدیاں ہیراں
اج وی ظالم قیدوں گھر گھر، اج وی کھیڑے لاڑھے
لوکی اپنے نک دی خاطر، خون دلاں دے کردے
پھلاں توں وی نازک جسے، تتیاں لوواں ساڑے
جیہناں نوں گر آپ سکھائے، اوہ وی سانوں چارن
انے کدی نہیں ہندے ڈٹھے، ہالیاں اگے پاڑے
اوہ ڈاہڈھا اے تے سانوں کی، صابر ہسے وسے
میرے جیہے وی جگ تے رہندے بھاویں ہوون ماڑے
صابر سودائی
No comments:
Post a Comment
Note: only a member of this blog may post a comment.