ساڈے لئی تے یار زمانے اوہو ای نیں
اج وی اوہدے کول بہانے اوہو ای نیں
لوکی مالک بن گئے شیش محلاں دے
ساہڈی کُلی اتے کانے اوہو ای نیں
جیہڑے ازلوں سر نذرانے دیندے رئے
اج وی بندے بُھکھن بھانے اوہو ای نیں
بال پنے دیاں کھیڈاں بُھلیاں اوہناں نوں
میرے اتھرے چاء مر جانے اوہو ای نیں
اوہنے ویہڑا ہور وسایا اے صوفی جی
اپنے گٹ دے اُتے گانے اوہو ای نیں
حنیف صوفی
No comments:
Post a Comment
Note: only a member of this blog may post a comment.