چندری ایہہ ونڈ دیاں دساں کیہ کہانیاں
ویہہ گئیاں سی لت پت لاشاں وچ پانیاں
انبراں دے نیناں وچوں لہو ڈُلھ پیا سی
اساں اک دُوجے دیاں وڈھیاں زنانیاں
چھویاں دے وج وج مونہہ مُڑ گئے سن
جھٹ وچ ہو گئیاں سی چھویاں پرانیاں
بچیاں نوں چُک چُک نیزیاں تے ٹنگیا
ہتھ جوڑ جوڑ رہیاں ماواں مر جانیاں
عزتاں بچائیاں چھالاں کھوہ وچ ماریاں
جنگلی درندے آ گئے پچھے وچ پانیاں
قوم دے شہیداں ساتھوں رو رو اج پُچھیا
دسو کیہڑے کم آئیاں سبھے قربانیاں
ہر پاسے لاشاں دیاں کندھاں سی اساریاں
ہر پاسے وجیاں سی لہو وچ گھانیاں
دوہاں پاسے اج وی تے راجیاں دے راج نیں
دوہاں پاسے اج وی نیں موجاں وچ رانیاں
بھرے ہوئے گھر سانوں واجاں رہ گئے ماردے
چڑھ آئے ویری سانوں اگاں لگ جانیاں
دھرتی چوں اج وی گُلاب رہندے پُھٹدے
دھرتی چ نپیاں سی الھڑ جوانیاں
زاہد وفا
No comments:
Post a Comment
Note: only a member of this blog may post a comment.