پھُلاں دا اک ہار پنجابی
کھِنڈدی ہوئی مہکار پنجابی
ساہواں وچ پنجاب اے ٹُردا
"رت وِچ وسیا پیار پنجابی"
دانش حکمت سوجھ سیانف
چانن جہے افکار پنجابی
پنجابی نیں ہسدیاں رُتاں
پکھواں دی چہکار پنجابی
بُلھے شاہ دے پیری چھنکے
گھنگھرو دی جھنکار پنجابی
جے پڑھیے تے مت ملدی اے
باہو دا کردار پنجابی
میاں محمد، سخن تہاڈے
سُچل تے سچُیار پنجابی
ہیر تے رانجھا مرزا صاحباں
عشقے دا پرچار پنجابی
فر وی ودھدی پھلدی پئی اے
جھل کے لکھاں وار پنجابی
جیوے وسے شالا جگ تے
سوہنا ایہ پروار پنجابی
پورس بن سکندر ڈکیا
کیڈا اے جی دار پنجابی
تُوں وارث دُلے جبرو دا
بن سوہنا خوددار پنجابی
دھرتی نالے موسماں نالے
جُڑیا ہر تہوار پنجابی
پنگھٹ پربت وادی صحرا
دریا دا منجدھار پنجابی
عشق چناں دے سینے چیرے
بِن کشتی پتوار پنجابی
میری ذات دا تانا بانا
ساہ دی ہر ہر تار پنجابی
مُنجی کنک کماد کپاہواں
چیتر جہے رُخسار پنجابی
پھول آثار قدیمہ ویکھو
گھڑی نہیں تلوار پنجابی
دھی دی چُنی ماں دی چادر
پُرکھاں دی دستار پنجابی
اونے میرے ساہ نیں ودھدے
آکھاں جنی وار پنجابی
ربا مان ملے پنجابی تائیں
سجے کوئی دربار پنجابی
ماں سمجھایا انکھی پُترا
سمجھِیں ماں دے ہار پنجابی
احمد میری ماں دے دُدھ دی
قسمے ہر اک دھار پنجابی
علی احمد گجراتی
No comments:
Post a Comment
Note: only a member of this blog may post a comment.