مائے نی میرا داج وٹا دے
سُولاں والا جُثہ لے کے سُکھاں والی چادر پا دے
مائے نی میرا داج وٹا دے
کنڈیاں بھریا تکیہ میرا نیندر کیویں آوے
اتھرُو گہنے واپس لے جا سُفنے ہُن پرتا دے
مائے نی میرا داج وٹا دے
چن بِناں ہُن راتاں آون سورج بِناں سویرے
تارا وی کوئی نظر ناں آوے چانن فیر منگا دے
مائے نی میرا داج وٹا دے
آساں والے لیڑے وی نیں سدھراں والیاں ونگاں
مہندی دا کیوں رنگ نئیں چڑھدا ایہ مینوں سمجھا دے
مائے نی میرا داج وٹا دے
لُکن میٹی کھیڈ رہی آں پباں بھار کھلو کے
میرے پٹولے میریاں گڈیاں مینوں ہُن پرتا دے
مائے نی میرا داج وٹا دے
نامعلوم
No comments:
Post a Comment
Note: only a member of this blog may post a comment.