ہولی ہولی لتر لاہ کے
کجھ گھبرا کے کجھ شرما کے
کافی سارے گج وجا کے
ماہتڑ ساتھی نیوی پا کے
پاکستان دی پوری قوم
روز مناندی اکوئی یوم
ربا ساہڈی جان چھڈا دے
چور اچکے مگروں لاہ دے
ہر شے تے کر بیٹھے قبضہ
کھا چلے جھنڈے دا سبزہ
کوئی نئیں ایتھے پچھن والا
نہ کتیاں نوں گچھن والا
کتے رل کے چوراں نال
ملک پورے دا سارا مال
لے گئے کدھرے دیس بیگانے
قوم ترس گئی دانے دانے
دس دے ربا کدھر جائیے
کس نوں اپنا حال سنائیے
جس تے وی کرئیے اعتبار
اوہوئی کردائے رج کے خوار
چور تے کتی رل کے لٹدے
واری واری لٹ کے پھٹدے
توں وی کوئی نیاں نئیں کردا
کسے دا وی گلمہ نئیں پھڑدا
تیتھوں ایہہ امید نئیں سی
پہلے ایہہ شنید نئیں سی
پہلے ایہہ شنید نئیں سی
اشرف مخلص
No comments:
Post a Comment
Note: only a member of this blog may post a comment.