جیویں لہندے سجھ دے منہ تے خون دا رنگ نظر دے
جیویں وسِمنٹر ویلے ڈِیوا آخری وار اُبھر دے
اینویں میڈیاں نظماں میڈیاں سوچاں دیاں تصویراں
برہیوں دیاں سوغاتاں درداں سُولاں دیاں جاگیراں
بھوگ بھُگیندے ڈِیہاں۔ جاگدیاں راتیں دیاں تحریراں
کالی کوجھی رات وچ نوری خواباں دیاں تعمیراں
جوں جوں وقت گزردا ویندے، رنگ کڈھیندیاں آندن
میڈی آخری نظم دے کیتے راہ بنڑیندیاں آندن
جاں اظہار دے یوسف کوں خلقت دا خوف نہ ہو سی
اندھے کھو، توں باہر آسی۔ باکاں مار کے روسی
رکھ رکھا دے چولے توں فن خون دے دھبے دھوسی
ہر مصرعے دا مصرِ دیاں بازاراں وچ مُل پوسی
فن کوں توڑ چڑھاون کیتے جان دا صدقہ ڈیساں
روح آزاد کرن توں پہلے ہونٹھ آزاد کریساں
حسن رضا گردیزی
No comments:
Post a Comment
Note: only a member of this blog may post a comment.