بائی کروڑ
بائی کروڑ ایہہ کھوتے گھوڑے
پھک لئی لڑدے ماں کے بوڑے
درد ایہناں دے جان دا کوئی نئیں
کیہ نیں خود پہچان دا کوئی نئیں
ہر اک کم ایہناں توں لے کے
رات دِنے ایہناں تے بہہ کے
ہر اک کم کروا لیندے نیں
بتیاں مگر لگا لیندے نیں
کہندے اصلی مالک گھوڑے
وِچوں پکے ماں کے بوڑے
اکوئی گل تے پکے ہوئے
ٹال لئی ہر دم پکے ہوئے
تیلی لان دی دیر اے باقی
ساڑ کے رکھن اک اک ٹاکی
چووی گھنٹے اکوئی دوڑاں
کجھ نئیں کرنا ماں دے بوڑاں
راہ وچہ سُتے پی کے بھنگ
جتھوں جی کوئی جاوے لنگھ
ساہنوں فکر نہ کوئی فاقہ
لک وچہ ہے کہ گل وچہ لاچا
بُھکھے ہاں کہ ننگے ہاں
اپنے رنگیں رنگے ہاں
بڑے سیانے مالک ایتھے
بنی بیٹھے جے خالق ایتھے
اک دن اوہناں دا وی اوناں
ڈھاواں مار کے فِر نیں روناں
اشرف مخلص
No comments:
Post a Comment
Note: only a member of this blog may post a comment.