ساڈے ورگے یار وساری جاناں ایں
ٹھنڈے دُدھ نوں پھُوکاں ماری جاناں ایں
قدر پچھانن والے چھڈ کے بے قدرا
بے قدراں توں صدقے واری جاناں ایں
بھار ودھا کے دل تے گزرے ویلے دا
اپنا گَڈا آپ اُلاری جاناں ایں
صدق صفا دی گل کسے وی نئیں سننی
انھّے کھوہ وچ واجاں ماری جاناں ایں
عمراں لگ کے بن دی کھیڈ محبت دی
بنی بنائی کھیڈ کھلاری جاناں ایں
چار دیہاڑے کھیڈ تماشہ دنیا دا
ایویں ایتھے پیر پساری جاناں ایں
افتخار حیدر
No comments:
Post a Comment
Note: only a member of this blog may post a comment.