میلے کھیڈ تماشے چنگے لگدے نے
ہسدے بندے خاصے چنگے لگدے نے
دشمن اتے کراں بھروسہ پھبدا نئیں
سجناں دے بھرواسے چنگے لگدے نے
بے شک جان گواچے، منزل مل جاوے
نفعیاں والے گھاٹے چنگے لگدے نے
اپنے ورگا سمجھو سبھ انساناں نوں
ایہو رشتے ناطے چنگے لگدے نے
خُشیاں ہون تے بستے دے ہر ویہڑے وچ
ونڈدے لوگ پتاسے چنگے لگدے نے
ربا کسراں ویکھاں روندی دنیا نوں
ہر مُکھڑے ہاسے چنگے لگدے نے
اپنے وانگ جے راکھے کرن گوانڈھی دی
تاں اوہ آسے پاسے چنگے لگدے نے
حق انصاف دے بدلے ظالم ٹولے نوں
لگدے رہن تماچے چنگے لگدے نے
دین بچاندے پھردے آپنے نانے دا
وچ میدان نواسے چنگے لگدے نے
حق دی خاطر پیندے جام شہادت دے
کربل دے سبھ پیاسے چنگے لگدے نے
بابا طالب بٹالوی
No comments:
Post a Comment
Note: only a member of this blog may post a comment.