آخر بستی خموشاں وچ جاونا پیندا
سو برس نا بھانویں سامان کرئیے
تن من پئے اپنا قربان کرئیے
سدا رہن والی ایتھے گل کوئی نئیں
اس مسئلے دا دوجا حل کوئی نئیں
ہک نہ ہک دن کوچ سداونا پیندا
آخر بستی خموشاں وچ جاونا پیندا
ولی نبی قلندر نہ رئے ایتھے
اوہ قارون سکندر نہ رئے ایتھے
ٹُر گئے دعوے خدائی دے کرن والے
مُڑ کے آئے نہ کدے وی مرن والے
اپنے حصے دا رزق مکاونا ہیندا
آخر بستی خموشاں وچ جاونا پیندا
نہ دوائیاں لقمان دے کم آئیاں
آخر سد لیا آپنے کول سائیاں
نہ نمرود نہ کوئی شداد بچیا
ہر پاسے بس ایہوئی شور مچیا
جھوٹھی دنیا تو دامن چھڑاؤنا پیندا
آخر بستی خموشاں وچ جاونا پیندا
اس دنیا دے سب ساز و سامان کچے
محل و ماڑیاں تے سارے مکان کچے
قاسم دس نا ہور میں کی آکھاں
سنڑدا کوئی نی شور میں کی آکھاں
اٹھے پہرے ایہہ مغز کھپاؤنا پیندا
آخر بستی خموشاں وچ جاونا پیندا
وحید قاسم
No comments:
Post a Comment
Note: only a member of this blog may post a comment.