جنت ورگا پِنڈ تے پِنڈ دے پیار دیاں تصویراں
اکھاں وِچ نیں اج وی ہسدے یار دیاں تصویراں
لوکاں بھانے شعر نیں اُنج پر میں بناؤندا رہناں
اک تھاں رُک کے چوگاں چُگدے ڈار دیاں تصویراں
جی کردا اے فِر اک واری اک پنجاب وساواں
کٹھیاں کر کے آر دیاں تے پار دیاں تصویراں
دوروں تکیاں لگدے سی نا اِنج سرہوں دے بوٹے
جِسراں ہوون سولھ جہی مُٹیار دیاں تصویراں
کِناں ای چِر ہفتے تے اِتوار نوں بیٹھا رہناں
اج وی لے کے ہفتے تے اتوار دیاں تصویراں
بابے سانجھ سکھا گئے سن نا تاں تے لگدیاں مینوں
گُر دوارے جہیاں ای دربار دیاں تصویراں
اج وی روندے لہندے چڑھدے نیلی دے پرچھاویں
چیتے آون جِس لے ساندل بار دیاں تصویراں
جِس اکھراں نوں رت پیائی جِدھا ناں اے سندھو
گھر گھر لگیاں ہوئیاں اُس فنکار دیاں تصویراں
ارشاد سندھو
No comments:
Post a Comment
Note: only a member of this blog may post a comment.