امورت
ہنجواں دی رُت آئی
جِندڑئیے ہنجواں دی رُت آئی
چیتر لنگھیا وصل پنے دا
پَوناں نے اگ لائی
فِر ہنجواں دی رُت آئی
نین تِرے سرگی دے تارے
رشماں ونڈدے جان
دُکھاں کدے وی جون نہ بدلی
نِت نیناں نوں کھان
ہوٹھاں دے وِچ بھر مٹی
پانی دی پیاس بُجھائی
فِر ہنجواں دی رُت آئی
توں میرے گِیتاں دی ہانی
رنگ سبھائے تینوں
میں اکھاں چوں اکھاں چھاناں
چیتر لڑیا مینوں
پیار تِرے دی مہک نی کُڑئیے
ساڈے میچ نہ آئی
فِر ہنجواں دی رُت آئی
اک مُورت تے اک امُورت
کس ول مُڑ کے ویکھاں
برفاں جوئے جمن ہویا
ہڈیاں بال کے سیکاں
اکھ نمانی پِٹ کھلوتی
سُفنیاں سنگ وہیائی
فِر ہنجواں دی رُت آئی
جِندڑئیے ہنجواں دی رُت آئی
یونس متین
No comments:
Post a Comment
Note: only a member of this blog may post a comment.