تَسیاں بُلھاں لئی وی سوچو
میرے دیس دے دولتمندو
تے پردھانو
آپ تاں سُکھی جِیندے او
مِنرل واٹر پیندے او
دیس دا پانی کیوں نئیں پیندے
صرف ایس لئی
اس پانی وچ
ون سوَنیاں زہراں رلیاں ہوئیاں نیں
اپنے بھیجے اُتوں زَر دا زنگ کھروچو
سِکری جمیاں تَسیاں بُلھاں لئی وی سوچو
جِنھاں نوں اس موہرے دی وی تِپ نئیں لبھدی
رب سببی گل چِھڑی اے پانی دی
چلو ایہہ وی دسی جاواں
کُکھ ماتا دی
اِک دن بنجر ہو جاوے گی
رزق دے بُوہے ڈھو جاوے گی
ہر شے ودھنوں رُک جاوے گی
ایہہ ہریالی مُک جاوے گی
اَن پانی دا ایناں بھیڑا قال پوے گا
سب کجھ صفن صفایا ہو جائو
ایتھے سُنج دا سایا ہو جائو
ماہتڑ تاں کیہہ
اُلو وی مر جانے نیں
جے نہ اَج وی چارہ کیتا پانی دا
میرے دیس دے دولتمندو
تے پردھانو
حالی وی کجھ کر سکنے آں
اَکھ چ پانی بھر سکنے آں
حالی تاں ایں تَند وِگڑیا تانی دا
جے کر ایہو حال رہیا تے
فِر اوہ دن کوئی دُور نئیں
جیہڑے دن ایہہ ساری تانی
رب کرے اوہ دن نہ آوے
رب کرے اوہ دن نہ آوے
شبیر نازش
No comments:
Post a Comment
Note: only a member of this blog may post a comment.