مینوں ملیا بابا اک
ہاڑھ دوپہرے چھاں ورگا
لوکی سمجھنڑ کاں ورگا
مینوں جاپے ماں ورگا
مینوں ملیا بابا اک
پنڈا رزق حلال دا پلیا
خوشبو چانن وچ ڈھلیا
عشق نے اوہدا جی ملیا
مینوں ملیا بابا اک
منجی اوہدی تخت جاپے
قول کلام بخت جاپے
ذکر الٰہی وچ مست جاپے
مینوں ملیا بابا اک
گودڑی ہے لعلاں بھری
جیب علم مالاں بھری
نگاہ ہے چالاں بھری
مینوں ملیا بابا اک
ہر ایک نوں شیشا دِسے
رجیاں نوں پیاسا دٍسے
ترسیاں نوں دریا دِسے
مینوں ملیا بابا اک
نالڑ اوہدے ٹُرنا اوکھا
پَلّا چھڈ کے مُڑنا اوکھا
اوہدی اڈاری اُڑنا اوکھا
مینوں ملیا بابا اک
اوہنوں پونڑاں ہے دشوار
اہدے روپ نیں کئی ہزار
میرے روح دی اوہ بہار
مینوں ملیا بابا اک
نگاہ اوس دی سارے پاسے
دکھ تکلیفاں چارے پاسے
قلب دی سوئی یارے پاسے
مینوں ملیا بابا اک
بے نقطے ڈوگر دا نقطہ
باطن اور ظاہر دا نقطہ
اوہ میرے اندر دا نقطہ
مینوں ملیا بابا اک
راشد ڈوگر
No comments:
Post a Comment
Note: only a member of this blog may post a comment.