برٹش ہاں نہ پاکی ہاں​ اک عاجز بندہ خاکی ہاں

 برٹش ہاں نہ پاکی ہاں​

اک عاجز بندہ خاکی ہاں​

میں وچ ولائیت رہندا ہاں​

دُکھ درد ہزاراں سہندا ہاں​

نہ ساڑی ہاں نہ لہنگا ہاں​

اک لِیراں لَتھی ٹاکی ہاں

​برٹش ہاں نہ پاکی ہاں​

​

میں پاؤنڈ کماون آیا ساں​

یا نسل گماون آیا ساں​

بگڑی نوں بناون آیا ساں​

ہُن بن گیا ہجر فراقی ہاں​

برٹش ہاں نہ پاکی ہاں​

​

میں وطن پیارا چھوڑ دِتا​

کی کھٹیا کی میں روہڑ دتا​

دل میرا دنیا توڑ دتا​

شرابی ہاں نہ ساقی ہاں​

برٹش ہاں نہ پاکی ہاں​

​

مینوں اپنے وی گل لاؤندے نئیں​

نالے گورے وی کول بٹھاؤندے نئیں​

دکھ جھلے میں تھوں جاؤندے نئیں​

میں آخر اک بلیکی ہاں​

برٹش ہاں نہ پاکی ہاں​

​

کوئی بگڑی نئیں بنا سکدا​

نسل اپنی نئیں بچا سکدا​

دکھ درد نئیں چھپا سکدا​

نہ لاٹھی ہاں نہ ہاکی ہاں​

برٹش ہاں نہ پاکی ہاں​

​

جد پاکستاں میں جاندا ہاں​

اُوہدوں ویزہ وی لگواندا ہاں​

نالے دھکے وکھرے کھاندا ہاں​

جیویں پاکی بس اتفاقی ہاں​

برٹش ہاں نہ پاکی ہاں​

​

پاسپورٹ تے دو دو رکھدا ہاں​

ائیرپورٹ تے فیر وی پھسدا ہاں​

میں اپنے آپ تے ہسدا ہاں​

کیوں ذلت لئی میں باقی ہاں​

برٹش ہاں نہ پاکی ہاں​

ایتھوں جا کے اوتھے رَلدا نئیں​

جیویں کھوٹا سکہ چلدا نئیں​

کوئی جیب کٹن توں ٹلدا نئیں​

نہ ہون جیہا میں باقی ہاں​

برٹش ہاں نہ پاکی ہاں​

​

میں شاعر صدیق دیوانہ ہاں​

گھر اپنے وچ بیگانہ ہاں​

گل سچی آکھ سنانا ہاں​

نہ کردا کوئی چلاکی ہاں​

برٹش ہاں نہ پاکی ہاں​

اک عاجز بندہ خاکی ہاں​

​

محمد صدیق میرپوری​