نی سئیو
درداں ڈیرے لائے
ویکھ حوصلہ ساڈا سجن ہتھیں قبریں پائے
نی سئیو درداں ڈیرے لائے
ایہ اکلاپے ماری جندڑی کی لاہنی کی پَونی
کجلا بالن بنیا، پَے گئی اکھ تندوری تَونی
ہُن تے قبر دِیاں کندھاں تک کلیاں عمر ہنڈونی
سُورج ٹُٹ اسمانوں ڈِگیا اکھیں نیھرے آئے
نی سئیو درداں ڈیرے لائے
یاد کسے دی ادھی راتی اُٹھ اُٹھ وَین پکارے
رنڈیاں باہواں دے وچ پِٹن ونگاں دے چھنکارے
خَورے کیس جہانے ٹُر گئے لعلاں دے ونجارے
بے دردی ایہ رات ہنیری چب چب چانن کھائے
نی سئیو درداں ڈیرے لائے
ہجر ترے دِیاں لمیاں راتاں یاد تری وچ گُھنیاں
چک ٹرنکاں وچ لکایاں گوٹے والیاں چُنیاں
نہ ای مرزا یار آیا، نہ گلیاں ہویاں سُنجیاں
خالص سونے ورگے جوبن کوڈیاں مُل لٹائے
نی سئیو درداں ڈیرے لائے
ویکھ حوصلہ ساڈا سجن ہتھیں قبریں پائے
نی سئیو درداں ڈیرے لائے
یونس متین
No comments:
Post a Comment
Note: only a member of this blog may post a comment.