پنجابی پوٹھواری پوٹھوہاری پہاڑی شاعری
چوخی خاباں نی ست رنگی، سِک، ترُٹنے ساہ، سدراں
ہک ہک پہر قیامت بنڑتا، کسرے لمّی رات لنگہھاں
کِھڑ کِھڑ ہسّن اکّھر مہھاڑی شکلا اپر جس لے میں
تہھاڑے بارے کج وی بولاں، اِنہاں کولوں مِیہنڑے کھاں
جے کد مہھاڑا اندر رُٹّھا مہھاڑی اپنڑی عادت سِیں
ہور کسے کی میں کیہ پُچھاں ہُنڑ، کیہ آخاں تے کیہ باں
حد نینہ ہوئی گی، دسو خاں وئی ایہہ چنگی بدماشی اے
تُس ہاسے نیاں چُوڑاں بنّو، میں زخماں کی سیک لواں
اُٹھ کُڑیے مزمہان پئے اسنے، چُلّہا چوکی سانبھ ذرے
تک نا پار بنیرے اپر، چِر پیا ہونڑاں، بیٹھا کاں
عبدالرحمان واصف
No comments:
Post a Comment
Note: only a member of this blog may post a comment.