گھر دا بُوہا
اِک سی میرے گھر دا بُوہا
چِٹے پٹ تے متھا سُوہا
ڈُھکدا کھُلدا چِیں چِیں کردا
دُھپے کھاندا سِی نہ کردا
مہینہ پھانڈے وچ پجھدا رہندا
شِکر دوپہرے رِجھدا رہندا
لوآں دُھپاں نُوں اوہ روکے
اگل واہنڈی سب توں ہو کے
چور اُچکے توں نہ ٹٹدا
چوتھی پکی سکے رُکھ دا
قبضے کُنڈے سنے چوگاٹھے
بھخدا وانگر گبھرو کاٹھے
ہر کوئی اوتھوں نیوں کے لنگھدا
نیویاں اکھیاں سنگ دا سنگ دا
کجھ ورھیاں توں بعد میں تکیا
تکیا تے پر جَر نہ سکیا
لکڑ سُک تریڑاں پئیاں
ہر ریشہ کر وکھرا گئیاں
اک اِک پیچ ہویا فِر ڈِھلا
ہلنا جُلنا ہویا جھِلا
جھُکھڑاں دی اوہ مار کی سیہندا
ہر پَٹ اُس دا ہِلدا رہندا
واج سی اُس دی کھڑ کھڑ کر دی
فِر وی راکھی گھر دی کر دی
اِک دِن کُنڈا ہویا نِکّا
سنے چوگاٹھے ویڑے ڈِگّا
چھڈ گیا سب کندھاں کولے
مُک مکا گیا سبھ رولے
کر گیا لُگا سارے گھر نوں
سارے گھر دے اِک اِک در نوں
شوق سبھے ہُن کڑیاں ڈولن
کِڑ کِڑ کِڑ کِڑ کِڑ کِڑ بولن
غلام رسول شوق
No comments:
Post a Comment
Note: only a member of this blog may post a comment.