ماہیا وے
اساں چولا پایا عشقے دا
اساں بنھ لئے گھنگرو یار دے
دس کیہ کریے ایہناں اکھیاں دا
وچ سفنے چھمکاں مار دے
ماہیا وے
اساں چیتر گروی رکھیا سی
اج ہاڑ کنارے بہ گئے آں
سبھ بوٹے آس دے سڑ گئے نیں
اساں دھپاں سہن نوں رہ گئے آں
ماہیا وے
اساں جھوٹھی گل نوں جھوٹھ کہیا
اج دنیا ساری ویری اے
ساڈے اگے دلدل خوف دے
ساڈے پچھے لال ہنیری اے
ماہیا وے
ساڈے اندر تاپ وچھوڑے دا
سانوں اندرو اندری مار گیا
کجھ سفنے سانبھ کے رکھے سی
کوئی ککھاں وانگ کھلار گیا
ماہیا وے
اساں چرخہ کتیا جیون دا
ساڈے لوں لوں پیڑاں بھر گیاں
اساں ساہنواں روک کے سنیا اے
ساڈے اندر ہانواں مر گیاں
صغیر تبسم
No comments:
Post a Comment
Note: only a member of this blog may post a comment.