پنجابی سرائیکی شاعری
پہلے اینجھے دانڑے چھٹنڑے کائنی ہوندے
یا ول نسریے بوٹے پٹنڑے کائنی ہوندے
ساکوں ہجرت کرنڑ دیاں دھمکیاں کیوں پیاں ملدن
اساں کوئی گھر بار تاں پٹنڑے کائنی ہوندے
سچے پیار دی خاص نشانی اے وی ہے جو
یار دے فوٹو فون ءچ رکھنڑے کائنی ہوندے
کجھ او زخم ہن جیکوں سیونڑا کائنی ہوندا
کجھ او ڈُکھ ہِن جیڑھے ڈسنڑے کائنی ہوندے
اکھ دی وال تے اوہے منظر فِٹ تھی ویندن
جیڑھے اساں ول ول تکنڑے کائنی ہوندے
پکھی ساڈے پیار دا ہنڑ اعتبار کریندن
ساکوں پنجرے جوڑ کے رکھنڑے کائنی ہوندے
مالی اتنا کاوڑ نال الیندا کیوں پئیں
اساں تیڈے پُھل تاں پٹنڑے کائنی ہوندے
سجاد عارض
No comments:
Post a Comment
Note: only a member of this blog may post a comment.