میڈی اکھیں دے تھیٹراں وِچ
کوئی ڈرامہ چلا کھڑا ہے
میڈے خیالاں دے اندر اندر
شیکسپیئر دا قلم رُکا ہے
میڈی اکھیں دے سامڑیں ہن
حسین کردار
کہ جیڑھے خود کوں نبھیندے ودِن
کتھائیں بازاراں ءِچ میک بتھ ہے
کتھائیں دیہاتاں ءِچ جولیٹ ہے
کتھائیں ہے اجڑا تے شودھا ہیملٹ
ایں ہک جگہ تے اے سارے کردار
کجھ نہ چاہ کے وی جیندے ودن
زندگی دا زاہر پیندے ودن
میں انہاں ءِچ شامل ہاں بس
میں اپڑیں خواباں کُوں ڈیکھ گھناں تاں میکوں لگدے
کہ میں وی کیں ہک قلم دی مار ہاں
میں سیاہی دا جگری یار ہاں
میں اپڑیں دنیا کوں ڈیہدا ہاں تاں اے میکوں لگدے
کہ رنگ برنگی اے دنیا ساری
پرانڑیں تھیٹر دا حصہ ہے ہک
تے زندگی وی ہے شیکسپیئر دا کوئی ڈرامہ
کہ جیڑھا تھیٹر تے چلدا آندے
اے زندگی ہے قلیوپطرہ دے ناں دی کوئی ہک حسین عورت
کہ جیکوں مونجھاں دے مارے سیزر تسلی ڈیندن
تے اپڑیں سینے تے آ سمیندن
مگر اے آخر دی گالھ ہے کہ
میں انت منظر دا منتظر ہاں
اے لال کپڑا ہے ڈھاونڑ آلا
تے ہولیں ہولیں ڈرامہ سارا
اپڑیں آخر دو ودھدا ویندے
میڈا کردار مردا ویندے
طلحہ رحمان شاہ
No comments:
Post a Comment
Note: only a member of this blog may post a comment.