پہلے دل دی تازہ کاری کیتی گئی اے

 پہلے دل دی تازہ کاری کیتی گئی اے

بعد اچ غم دی پیوند کاری کیتی گئی اے

ہر کہیں اپنڑے حصے جتنا ڈُکھڑے چاتن

ساڈے سر دی گنڈھڑی باری کیتی گئی اے

اساں تاں بس جیونڑ کیتے پگھر پیتے

ساکنیں کتھاں دنیا داری کیتی گئی اے

اساں اپنڑی ذات دے منکر تھیندے گئے ہیں

بعد اچ اینجھی وحشت طاری کیتی گئی اے

جئیں وی مرنڑے پہلے اپنڑی قبر کھٹے

ہونڑیں ہونڑیں خبر جاری کیتی گئی اے

اوں وی اتنا جانڑ کے ساکوں دھوکے ڈتن

جیندی جتنا پیروکاری کیتی گئی اے

اتنا غصہ اکھ وچ پہلے کائنا ہائی

ساری سختی ساڈی واری کیتی گئی اے

اوں وستی تے بعد اچ قبضہ سوکھا تھی گئے

پہلے جیندی سوچ بزاری کیتی گئی اے

توں جو باکاں بھر بھر روندئیں میکوں ڈس ہاں

بھوئیں تیں الفت پہلی واری کیتی گئی اے

تئیں سمجھےاو پیار کریندے تیکوں پگلی

او تاں بس ہک رات گزاری کیتی گئی اے

اوہو ساڈی اکھ دا سوجھل چاتی ویندے

سجھ تئیں جیندی خدمت گاری کیتی گئی اے

انہیں ساڈے روونڑ تیں وی بس نئیں کیتی

خالص ہنجھ وی کاروکاری کیتی گئی اے

اساں تیڈے دل وی تیڈا جاں وی تیڈی

تئیں توں عارض کشے پیاری کیتی گئی اے

سجاد عارض