پنجابی شاعری
بوہے ول نوں دیکھدیاں کی اکھیاں نے
شاید تیریاں ہن وی تانگھاں رکھیاں نے
اڈ گئے پنچھی موسم دے تے موسم نال
دیوے دھری بنیرے، بیٹھیاں سکھیاں نے
آؤن پسینے، لہہ جائے خورے تاپ ترا
کم آؤنا اوڑک یاداں دیاں پکھیاں نے
بن بدل مینہہ وسدا چار چپھیرے ہے
ساون بھادوں وانگوں ورھیاں اکھیاں نے
محلاں دے اندر اوہ کتے گواچ گئیاں
لوکاں بھاویں رانیاں کنت سنکھیاں نے
اوہدے لئی کی لطف وسالاں وچ خاور
ہجر دیاں سوغاتاں جس نے چکھیاں نے
خاور راجا
No comments:
Post a Comment
Note: only a member of this blog may post a comment.