اینویں کرن نال بھلا غم چوکھا مَٹھا تھیندے
ہر بندے دے نال ودا او تِکھا مٹھا تھیندے
ہوں ہوں ویلھے راہ تیڈی تے پھُل کھنڈیر رکھینداں
جیں جیں ویلھے ٹیشن اُتے گاڈا مٹھا تھیندے
زور دے اگوں زاری آلا قول ہے واقعی سچا
استری آلا بٹن سٹوں پکھا مٹھا تھیندے
ہک ڈینہہ ہوندا جانو بنڑساں خاص امید ہے میکوں
کیوں جو پیار نی یکدم تھیندا مٹھا مٹھا تھیندے
روز سکول دا روح نی تھیندا روز بخار ویڑھیندے
ڈاڈا جیلے لکڑ چیندے کوسا مٹھا تھیندے
جڈاں تیکوں ملن آنداں سی توں کنبڑیں لگے
جڈاں تیڈے قرب اچ آنداں پالا مٹھا تھیندے
کڈن دا ہک گھبرو نینگر ربوں داپھا ہاسی
ہن ہوں جاہ تے لاری آلا یکا مٹھا تھیندے
ڈوجھے ڈاند کوں ہکل ڈیووں پہلا پیر نی چیندا
پہلے ڈاند کوں چھمکی ماروں ڈوجھا مٹھا تھیندے
گھر بھائیاں دا جھیڑا باقر زیادہ دیر نی ٹُردا
نکا جے کر حد ٹپے تاں وڈا مٹھا تھیندے
بلال باقر
No comments:
Post a Comment
Note: only a member of this blog may post a comment.