وت کوئی دل کوں سادہ لگدے
ڈیکھو میڈا کیا کیا لگدے
اوندی گالہہ اچ آ نہ ونجیں
ڈانڑاں چیندیں دزکا لگدے
ڈکھ اپڑیں کوں کیویں جھنڑکاں
میکوں پیو دا سینگا لگدے
جتنا خوش لگدا پئے اج او
اوندے نل کوئی مسلہ لگدے
میڈے بارے نہ سوچا کر
در ہووے تاں تالا لگدے
میڈی قیمت کیویں ڈیسیں
ایں رقبے کوں نالہ لگدے
اینجھے مالک دا نوکر ہاں
ہک پھٹی تے کھوکھا لگدے
جوڑیاں اسماناں تے بڑدن
توگی دے نل توگا لگدے
میں اتنا بدماش وی کائنی
جتنا تیکوں ڈر پیا لگدے
اوندی خاطر ہردوں بیٹھے
اوندے گھر وچ جوا لگدے
اساں جتھ جتھ جنگل منگدوں
اتھاں اتھاں آرا لگدے
مولا پیٹ دا ڈکھ ناں ڈیویں
اے کتا کج بھاگا لگدے
جیڑھا دگ وی گھن تے ونجاں
اوندے گھر دا رستہ لگدے
توں وی اتھاں رہندا ہاویں
سوچ تے کتنا چنگا لگدے
ساڈی اداسی عادت تک ھ
ہر کم پہلے اوکھا لگدے
یار اینکوں وی عشق تھیا ہا
شکل توں کتنا بھولا لگدے
پہلے روح کوں ویچا ویندے
ول رقبے کوں کانا لگدے
میں اُوں شہر اچ کلہا رہ گیاں
جتھ بندے وچ بندہ لگدے
بھل سگدیں توں میکوں جلدی
ویسے تاں ہک گھنٹہ لگدے
کہیں ویلے وی مر سگدا میں
میڈا خود کوں پلوتا لگدے
تئیں جا کتھوں لبھ آواں میں
لوہے وچ کتھ کوکا لگدے
ڈوجھا عشق کریساں کائنا
ڈوجھی بال تے چوکا لگدے
اساں روہی واس ہیں مژدم
ساکوں کتھاں روزہ لگدے
مژدم خان
No comments:
Post a Comment
Note: only a member of this blog may post a comment.